ජනතාවට දුන් පොරොන්දු යථාර්ථයක් බවට පත් කිරීමේ දී පැමිණෙන අභියෝගවල ස්වභාවය හෝ ප්‍රමාණය වැදගත් නොවන බව ජනාධිපතිවරයා පවසනවා.
ජනාධිපතිවරයා මේ බව පැවසුවේ විවිධ ක්ෂේත්‍ර නියෝජනය කරන වෘත්තීයවේදීන් සමග පැවති සාකච්ඡාවකදී ය.
ජනාධිපති මන්දිරයේ පසුගියදා පැවති මෙම සාකච්ඡාවට අධ්‍යාපන, ප්‍රතිපත්ති, සමාජ විද්‍යා, කෘෂිකර්ම පර්යේෂණ, ජල සහ පුනර්ජනනීය බලශක්ති, වෛද්‍ය, ඉංජිනේරු හා නව නිපැයුම් මෙන්ම ක්ෂේත්‍ර රැසක් නියෝජනය කරන පිරිසක් එක්ව සිටියා.
කොවිඩ් 19 වසංගතය පාලනයට අවශ්‍ය පියවර ගනිමින් රටේ සංවර්ධන කාර්යන් සිදු කෙරෙන අතර වසර දෙකකට ආසන්න කාලයක් රට වසා තැබීමෙන් බිඳවැටුණු ආර්ථික ක්‍රමය ගොඩනැගෙමින් ඇති බව ජනාධිපතිවරයා මෙහිදී සඳහන් කර තිබෙනවා.
ජනාධිපතිවරයා අපේක්ෂා කරන ඉලක්ක ජය ගැනීමට අවශ්‍ය ශක්තිය ලබාදෙමින් ජාතික වැඩපිළිවෙළ ජයග්‍රහණය කරවීමට කැපවන බව මීට එක් වූ වෘත්තීයවේදීන් සඳහන් කළ බව ජනාධිපති මාධ්‍ය ඒකකය සඳහන් කරනවා.
එමෙන්ම ජනාධිපතිවරයා ආරම්භ කළ කෘෂිකර්මාන්තයේ නව ප්‍රවේශයට එම ක්ෂේත්‍රවල පූර්ණකාලීනව නියැලී සිටින පර්යේෂකයින්ගේ හා ව්‍යවසායකයින් ගේ සහාය ඕනෑම අවස්ථාවක ලබාදීමට සූදානම් බව ද මෙම සාකච්ඡාවට එක් වූ විද්වතුන් පවසා තිබෙනවා.
පුනර්ජනනීය බලශක්ති ප්‍රභවයන් වෙත යොමුවීමේ අවශ්‍යතාවය පෙන්වා දුන් ඔවුන් ඒ වෙනුවෙන් පවතින බාධා ඉවත් කර ගැනීමට රජයට කොන්දේසි විරහිතව සහාය පළ කරන බවත් මෙහිදී අවධාරණය කර ඇති බව වාර්තා වනවා.
