කෝවිඩ් 19 ගෝලීය වසංගතට ගොඳුරු වූ සමස්ථ ආසාදිතයින්ගේ සංඛ්‍යාව මිලියන පහේ සීමාව ඉක්මවා ගොස් තිබෙනවා. ඒ අනුව අද වන විට ලොවපුරා හඳුනාගෙන ඇති සමස්ථ ආසාදිතයින්ගේ සංඛ්‍යාව දැක්වෙන්නේ මිලියන 5.1 ක් ලෙසයි. වෛරසය හේතුවෙන් මේ වන විට ලොවපුරා සිදුව ඇති සමස්ථ මරණ සංඛ්‍යාව තුන්ලක්ෂ තිස්දහසකය ආසන්නයි. මේ අතර ලෝක සෞඛ්‍ය සංවිධානය පවසන්නේ වෛරස ව්‍යාප්තිය ආරම්භ වූවායින් පසුව දිනක් තුළ වාර්තා වූ ඉහළම රෝගීන් සංඛ්‍යාව ඊයේ දිනයේදී වාර්තා වී ඇති බවයි. ඔවුන් පවසන පරිදි ඊයේ දිනයේදී පමණක් ලොවපුරා නව ආසාදිතයින් එක්ලක්ෂ හයදහසකට වැඩි පිරිසක් හඳුනාගෙන තිබෙනවා.
ඒ අතුරින් වැඩිම නව ආසාදිතයින් සංඛ්‍යාවක් වාර්තා වී ඇත්තේ ඇමරිකා එක්සත් ජනපදයෙනුයි. ඊයේ දිනයේදී එරටින් නව ආසාදිතයින් විසිතුන්දහසකට වැඩි පිරිසක් සහ නව මරණ එක්දහස් පන්සියයකට වැඩි සංඛ්‍යාව වාර්තා වී තිබෙනවා. ඒ අනුව මේ වන විට එරටින් හඳුනාගෙන ඇති සමස්ථ ආසාදිතයින් සංඛ්‍යාව පහලොස් ලක්ෂ අනූ තුන්දහසකට අධික අතර සිදුව ඇති සමස්ථ මරණ සංඛ්‍යාව අනූපන්දහසකට ආසන්නයි.
මේ අතර වෛරසය ව්‍යාප්තිය පාලනය කිරීම සඳහා වසා දමා තිබුණු ඇමෙරිකා එක්සත් ජනපදයේ ප්‍රාන්ත 50 ම මේ වනවිට යම් ප්‍රමාණයකට විවෘත කර තිබෙනවා. එම ප්‍රාන්ත එකින් එකට සෞඛ්‍යාරක්ෂිත මාර්ගෝපදේශ, සීමා ලිහිල් කිරීම හා නීති රෙගුලාසි වෙන වෙනම දක්වා ඇති බවයි විදෙස් මාධ්‍ය වාර්තා කරන්නේ. තවමත් එරට ඇතැම් ප්‍රාන්තවලින් වාර්තා වන කොරෝනා ආසාදිතයන්ගේ ගණන වේගයෙන් වැඩිවෙමින් තිබෙන අතර ඇතැම් ප්‍රාන්තවලින් ආසාදිතයන් සහ මරණ වාර්තා වීම අඩුවෙමින් පවතිනවා. ඒ අතර ප්‍රාන්ත කිහිපයක කොරෝනා ආසාදිතයන් සහ වාර්තා වන මරණ පැවැති තත්ත්වයේම පවතින බවයි වාර්තා පෙන්වා දෙන්නේ. කෙසේවෙතත් ඇමෙරිකානු ජනාධිපති ඩොනල්ඩ් ට්‍රම්ප් රට විවෘත කරමින් ආර්ථික කටයුතු ආරම්භ කිරීමට සැරැසුණ ද වෛද්‍යවරු මෙන්ම සෞඛ්‍ය විශේෂඥයින් අනතුරු හඟවන්නේ තවමත් රට විවෘත කිරීම සුදුසු නැති බවයි.
ඇමරිකාවට පසුව වැඩිම දෛනික ආසාදිතයින් සංඛ්‍යාවක් වාර්තා වන්නේ බ්‍රසීලයෙනුයි. ඊයේ දිනයේදී එරටින් නව ආසාදිතයින් විසිදහසක් වාර්තා වී තිබෙනවා. එය දැක්වෙන්නේ එක්දිනක් තුළ එරටින් වාර්තා වූ ඉහළම ආසාදිතයින් සංඛ්‍යාව ලෙසයි. ඒ අනුව මේ වන විට බ්‍රසීලයෙන් වාර්තා වන සමස්ථ ආසාදිතයින් සංඛ්‍යාව දෙලක්ෂ අනූතුන් දහසකට අධික අතර සිදුව ඇති සමස්ථ මරණ සංඛ්‍යාව දහ අටදහසකට අධිකයි.
කෝවිඩ් 19 වෛරසය හේතුවෙන් පාකිස්තානයේ සිදුව ඇති මරණ සංඛ්‍යාව දහසේ සීමාව ඉක්මවා ගොස් තිබෙනවා. ඒ අනුව අද වන විට පාකිස්තානයෙන් වාර්තා වී ඇති සමස්ථ මරණ සංඛ්‍යාව 1017 වන අතට හඳුනාගෙන ඇති සමස්ථ ආසාදිතයින් සංඛ්‍යාව හතලිස් අටදහසකට අධිකයි. කෙසේවෙතත් මේ වන විට පාකිස්තානය තුළ පනවා තිබූ සංචරණ සීමා ලිහිල් කර ඇති අතර එරට සමහර වෙළඳසැල් නැවත විවෘත කර ඇති බවයි වාර්තා වන්නේ.
මේ අතර ලෝක බැංකුවේ සභාපති ඩේවිඩ් මැල්පාස් අනතුරු හඟවා තිබෙන්නේ කෝවිඩ් 19 අර්බුධය හේතුවෙන් ලොව පුරා මිලියන හැටක ජනතාවක් පමණ අන්ත දිළිදුභාවයට පත්වීමේ අවධානමක් පවතින බවයි. මෙම වසංගතය සමග කටයුතු කිරීමට සිදුව තිබීම නිසා ගෝලීය ආර්ථික වර්ධනය මෙම වසර තුළදී 5% කින් පමණ හැකිළෙනු ඇති බවට ලෝක බැංකුව අපේක්ෂා කරන බවද ඔහු වැඩිදුරටත් පවසා තිබෙනවා.
