සියලු දේශපාලනඥයන් විගණනයකට ලක්කළ යුතු බව ශ්‍රී ලාංකිකයින් 96.2%ක් තරයේ විශ්වාස කරන බව විකල්ප ප්‍රතිපත්ති කේන්ද්‍රය (Center for Policy Alternatives) මගින් සිදුකර ඇති සමීක්ෂණයකින් හෙළි වී තිබෙනවා.
එම වත්කම් තහවුරු කළ නොහැකිනම්, ඒවා රාජසන්තක කළ යුතු බව මේ ජනතාව විශ්වාස කරනවා.
මෙම සමීක්ෂණයට අනුව 87.3%ක් ජනාධිපති ගෝඨාභය රාජපක්ෂ ඉවත්විය යුතු බව පවසන අතර 89.7%ක් පවසන්නේ අග්‍රමාත්‍ය මහින්ද රාජපක්ෂ ඉවත්විය යුතු බවයි.
තවද නියැදි 1200ක් අනුසාරයෙන් සිදුකළ සමීක්ෂණයෙන් හෙළි වී තිබෙන්නේ 55.9%ක් පාර්ලිමේන්තු මන්ත්‍රීවරුන් 225 දෙනාම ඉවත් කළ යුතුය යන ස්ථාවරයේ සිටින බවයි.
74%ක් පවසන්නේ විධායක ජනාධිපති ක්‍රමය අහෝසි කළ යුතු බවයි.
ඊට අමතරව ශ්‍රී ලාංකිකයින් 88%ක් පවසන්නේ තමන් හෝ තමන්ගේ පවුලේ යම් පුද්ගලයෙකු අත්‍යවශ්‍ය භාණ්ඩ මිලදී ගැනීම සඳහා පෝලිම්වල රස්තියාදු වී ඇති බවයි.
ඊට අමතර තවත් 90%ක් වත්මන් ආර්ථික අර්බුදය හේතුවෙන් තමන්ගේ හෝ පවුලේ සාමාජිකයකුගේ ආදායම් මාර්ගයට සෘජු ලෙස බලපා ඇති බව ද පවසනවා.
