පවත්නා පාලකයන් සහ පාලනය අවසන් කිරීම අපේ වගකීමක් බව සරත් ඉද්දමල්ගොඩ පියතුමා පවසනවා. ජාතික ජන බලවේගය විසින් සංවිධානය කළ ‘සත්‍යය ප්‍රේමයෙන් කතා කරමු. යුක්ති ධර්මය උදෙසා නොබියව නැගී සිටිමු’ යනුවෙන් සංවිධානය කළ පාගමන අවසානයේ පැවැත්වෙන රැළිය අමතමින්. මීගමුව මාරිස්ටෙලා විදුහල අසලින් ආරම්භ වූ පාගමන අවසානයේ රැළිය පැවැත්වෙන්නේ මීගමුව ලේයිටන් ක්‍රීඩා පිටියේදී යි.
“මේ අයගේ අත්දැකීම්, මේ අයගේ පීඩාව මම හොඳටම දන්නවා. පසුගිය කාලය තුළ විවිධ ආණ්ඩු රට පාලනය කළා. එක්තරා වෙලාවක ශ්‍රී ලංකා නිදහස් පක්ෂය ආණ්ඩු කළා. තවත් වෙලාවක එක්සත් ජාතික පක්ෂය ආණ්ඩු කළා. මේ දෙගොල්ලොම යටතේ මේ රටේ ජනතාව පීඩාවට ලක්වුණා. එක්තරා කාලයක නිල පාටයි රතු පාටයි එකට එකතුවෙලා රට පාලනය කළා. ඒත් ටත්වය වෙනස් වුනේ නැහැ. ආණ්ඩු එනවා ආණ්ඩු යනවා ජනතාව දිගටම පීඩාවට පත් වෙනවා. එවන් තත්වයක් තමයි අපි දිගටම අත්වින්දේ.
දිගින් දිගටම ඒ පීඩාව තියෙද්දී අවුරුදු තුනකට කලින් තවත් පීඩාවක් ගෙනාවා පාස්කු ඉරිදා බෝම්බ ප්‍රහාරය. තින්සිය ගණනක් මිය ගිහින් තියෙනවා. තව සිය ගණනක් ජීවිතය පුරා ආබාධිතයන් බවට පත්වෙලා තියෙනවා. ඒක මාරාන්තික සිදුවීමක්. දැන් ඉතින අපි යුක්තිය ඉල්ලනවා ඒ වින්ධිතයන් වෙනුවෙන්, ඒ අයගේ පවුල් වෙනුවෙන්. ඔබලා විශ්වාස කරනවද කවදාක හෝ මේ පාලකයන් හෝ මේ පාලනය මේ ජනතාවට යුක්තිය ඉටු කරයි කියලා. නැහැ, කවදාවත් ඒ අය ඒක ඉටුකරන්නේ නැහැ. ඒ වෙනුවට ඔවුන් කරන්නේ ඒ වගකිවයුත්තන්, මේ ප්‍රහාර මෙහෙයවපු අය, මේ පරීක්ෂණ කරපු අය මේ පරීක්ෂණ යට ගහලා මේ වගකිවයුත්තන් කව්ද කියන එක හංඟනවා. ඔවුන් සඟවනවා මේ මහ මොළකරු.
ඒ නිසා මේ ආණ්ඩුවෙන් පාස්කු ඉරිදා ප්‍රහාරය පිළිබඳව යුක්තිය ඉටුවෙයි කියලා අපි විශ්වාස කරන්නේ නැහැ.
මේ වින්ධිතයින්ට යුක්තිය ඉටුවෙන්න නම් මේ පාලකයන්ව ගෙදර යවන්න ඕනේ. මේ පාලකයන්ට ඉල්ලා අස්වෙන්න කියලා කියන්නම ඕනේ. ඔවුන් ඉන්නතාක් ජනතාවට යුක්තිය ඉටු වෙන්නේ නෑ.
ඔබ හොඳටම දන්නවා මේ ඝාතකයන් පළමුව කළ ඝාතනය පාස්කු ඉරිදා බෝම්ම ප්‍රහාරය නොවන බව. ඊට කලින් මාධ්‍යකරුවන්ව ඝාතනය කළා. ප්‍රවීණ ක්‍රීඩකයින්ව ඔවුන් ඝාතනය කළා. මේ පාලකයෝ යුද්ධයක් ඇවිලෙව්වා. දේශපාලන විසඳුමක් දීමට අවස්ථාව තියෙද්දී යුද්ධයක් අවුලලා දහස් ගණන් දෙමළ ජනතාව මරලා දැම්මා. ඒ, බලයේ ඉන්න.
මේ පාලකයන්ට අවශ්‍ය වෙන්නේ බලය විතරයි. ඔවුන්ට යුක්තිය ඕනේ නැහැ. සාධාරණත්වය ඕනේ නැහැ. බලය සඳහා ඕනෑම වරදක්, ඕනෑම ඝාතනයක් කරන්න ඔවුන් බය වෙන්නේ නැහැ. ඔබ කැමතිද එවැනි පාලනයක් යටතේ ජීවත් වෙන්න. ස්ථීර වශයෙන්ම ඔබ කැමතිත් නැහැ, මම කැමතිත් නැහැ. ඒ නිසා මේ රාජපක්ෂ පාලනය ශ්‍රී ලංකාවෙන් දුරු කිරීම සඳහා, එලවා දැමීම සඳහා අපි ක්‍රියාමාර්ග ගත යුතුමයි.
අපි කිතුනුවන් හැටියට කොහොමද පාපය දුරු කරන්නේ; ඒ අර්ථයෙන්ම රාජපක්ෂ පාලනයත් මහා පාපයක්. ඒ නිසා අපේ අධ්‍යාත්මික ජීවිතය තුර පාපය දුරු කරනවා මෙන්ම කටුවාපිටිය, කොච්චිකඩේ, මඩකලපුව වගේම කොළඹ සිදු කළ පාස්කු දින ප්‍රහාරයට වගකිව යුතු මහමොළකරුවන්ව හංඟන මේ නායකත්වය පලවාහැරිය යුතුමයි.
මේ පාලනය දුරු කරන්න බැහැ මහා ජනතා බලවේගයක් නැතුව. ඊට ජනතා බලවේගයක් අවශ්‍යයි.
මම සෑහෙන කාලයක් ජනතාවගේ බලය සවිමත් කරන්න උත්සහ ගත්ත කෙනෙක්. හැබැයි මම අසාර්ථකයි.එහෙම ජනතා බලවේගයක් අපේ ජීවිත කාලය තුළ ඇතිවුණේ නැහැ. අද වෙනකොට එවැනි ජනතා බලවේගයක් ලෙස තියෙන්නේ ජාතික ජන බලවේගය පමණයි. අපි ඒ බලවේගය සමඟ එකතු වී මේ මොහොතේ ප්‍රධානම කාර්යය වන මේ දුෂ්ඨ පාලනය අතුගා දමමු”යි සරත් ඉද්දමල්ගොඩ පියතුමා පැවසුවා.
