මුහුණු ආවරණය ඉවත් කිරීම සම්බන්ධයෙන් සෞඛ්‍ය අමාත්‍යංශය ගත් තීරණය වෙනස් කිරීමට පියවර ගෙන තිබෙනවා.
සෞඛ්‍ය අමාත්‍ය මහාචාර්ය චන්න ජයසුමන පසුගියදා සඳහන් කර සිටියේ පොදු ප්‍රවාහනයේදී හා ගෘහස්ත උත්සව අවස්ථාවලදී හැර අනෙකුත් අවස්ථාවලදී මුහුණු ආවරණ පැළඳීම අත්‍යවශ්‍ය නොවන බවයි.
කෙසේ නමුත් සෞඛ්‍ය අමාත්‍යවරයාගේ තීරණය වෙනස් කරමින් සෞඛ්‍ය අමාත්‍යංශය මඟින් නව නිවේදනයක් නිකුත් කර ඇති අතර එහි සඳහන් වන්නේ, මේ දිනවල පැවැත්වෙන මහජන ඒකරාශීවීම් සැලකිල්ලට ගනිමින් මුහුණු ආවරණ ඉවත් කිරීමේ තීරණය තාවකාලිකව අත්හිටුවා ඇති බවයි.
ඒ අනුව පෙර පරිදි එළිමහන් ස්ථාන හා පොදු ස්ථානවලදී මුහුණු ආවරණ පැළඳිය යුතු බව සෞඛ්‍ය අමාත්‍යංශය වැඩිදුරටත් සඳහන් කරනවා.
