පුද්ගලයන් 279 දෙනෙකුට මරු කැඳවූ 2019 පාස්කු ඉරිදා දිනය වූ අප්‍රේල් 21 එල්ල කළ ත්‍රස්ත ප්‍රහාරය ට අදට (21) වසරක් තුනක් වනවා.
මෙම සමූල ඝාතනයේ පළමු හැඟීම වූයේ එය තනිකරම ඉස්ලාමීය අන්තවාදීන් කිහිප දෙනෙකුගේ ත්‍රස්ත ක්‍රියාවක් බවයි. එහෙත් පසුකාලීන විමර්ශනවලින් පෙනී යමින් තිබෙන්නේ මෙම සංහාරය මහා දේශපාලන කුමන්ත්‍රණයක කොටසක් බවයි. එය ප්‍රහාරයේ බහුතර වින්දිතයන් බවට පත් වූ කතෝලික ප්‍රජාවගේත් හැඟීමයි. විශ්වාසයයි.
2019 අප්‍රේල් 21 දින කොළඹ, කොච්චිකඩේ ශාන්ත අන්තෝනි දේවස්ථානය, මීගමුව, කටුවාපිටිය ශාන්ත සෙබස්තියන් දේවස්ථානය සහ මඩකලපුව, සියොන් දේවස්ථානය සහ අගනුවර තරු පන්තියේ හෝටල් තුනක් ඉලක්ක කරගත් ප්‍රහාර එම වසරේ නොවැම්බරයේ පැවති ජනාධිපතිවරණයෙන් ගෝඨාභය රාජපක්ෂට ජයග්‍රහණය කිරීමට උපකාරී වූ බවයි මේ වන විට කතෝලික ජනයාගේ චෝදනාව වන්නේ.
ජීවිත අහිමි කළ මෙම ප්‍රහාරය “බිහිසුණු අපරාධයෙන් වසර තුනකට ආසන්න කාලයක් ගතවී ඇතත්, එම පාස්කු ඉරිදා සිදුවූයේ කුමක්ද යන්න පිළිබඳව අප තවමත් සිටින්නේ අඳුරේ” බවයි අගරදගුරු මැල්කම් රංජිත් කාදිනල් හිමි පවසන්නේ.
