පක්ෂ නායකයන් එකඟ වන්නේ නම් ජනපති ඉවත්වීමට සූදානම් යැයි තමා නොකියූ බව කතානායක මහින්ද යාපා අබේවර්ධන අද (20) පාර්ලිමේන්තුවේ දී පැවසුවා.
තමා එවැනි කතාවක් කීවේ යැයි සජිත් ප්‍රේමදාස කළ ප්‍රකාශයක් මාධ්‍යයේ යන බව කී කතානායකවරයා එය අසත්‍යක් බව ද සඳහන් කර සිටියා.
කතානායක:-
“113ක් ආවොත් ආණ්ඩුව දෙන්න සූදානම් බවයි ජනාධිපතිතුමා පැවසුවේ. ජනාධිපතිවරයාට ඉල්ලා අස්වෙන්න කියන්න පාර්ලිමේන්තුවේ 225ටම බලයක් නැති බව ඔබතුමා තේරුම් ගන්න”
විපක්ෂ නායක :-
“මා ඉදිරිපිට දිනේෂ් ගුණවර්ධන හිටියා. ඔබතුමා එවැනි කතාවක් කිව්වා.ඔබතුමා වැරදි විග්‍රහයක් කරනවා.මෙතන පැමිණ මා පැවසූයේ ඉස්පිල්ලක් පාපිල්ලක් නෑර ඔබතුමා කියූ දෙයයි. ඒ වගේ කතා දැන් කියන්නෙපා.ඔබ තුමා කතානායක නෙවෙයි. පචයෙක්.”
කතානායක:-
“ටොන් පච කියන්නේ ඔබයි.”
විපක්ෂ නායක :-
“මට කිසිම උවමනාවක් නැහැ බොරු කියන්න. ඔබතුමා ඒ ප්‍රකාශය කළ විට මා වෙලාවක් අරන් දෙන්න කිව්වා. ඔබ තුමා කියූ දේ විකෘති කර කතා කරන්න තරම් මා මෝඩයෙක්ද?”
ලක්ෂ්මන් කිරිඇල්ල :-
“ජනාධිපතිතුමාට තිබෙන ප්‍රශ්නය වන්නේ එතුමා ගියොත් ඉදිරියට වන්නේ කුමක්ද යන්න බවත් පක්ෂ නායකයන් කියනවා නම් අස්වෙන්න සූදානම් බවත් ඔබතුමා පක්ෂ නායක රැස්වීමේදී පැවසුවා.”
කතානායක:-
“ජනාධිපති තුමා කිව්වේ සිය 113 පෙන්නුවොත් ආණ්ඩුව දෙන්නම් කියලා.”
ලක්ෂ්මන් කිරිඇල්ල :-
“අපිට එතුමා ආණ්ඩුව දෙන්න ඕන නෑ. ගන්න පුළුවන්. අපට 113 තියෙනවා.”
