කොළඹ ගෝල් ෆේස් පිටියේ පැවැත්වෙන විරෝධතාවයේ කටයුතු නිරීක්ෂණය කිරීමට ශ්‍රී ලංකා මානව හිමිකම් කොමිසන් සභාව පියවර ගෙන තිබෙනවා.එහි ප්‍රකාශකයෙකු සඳහන් කළේ, මානව හිමිකම් කොමිසමේ විශේෂ කණ්ඩායමක් එම ප්‍රදේශයේ අදාළ නිරීක්ෂණ කටයුතුවල නිරතවන බවයි.
අදාළ විරෝධතාවය සාමකාමීව පැවැත්වෙන්නේ ද යන්න සම්බන්ධයෙන් සහ ඊට යම් යම් පාර්ශවවලින් බලපෑම් එල්ල වන්නේ යන්න පිළිබඳව මෙහිදී අවධානය යොමු කිරීමට නියමිතයි.
මේ අතර එම විරෝධතාවයට යුද හමුදාවේ පිරිසක් පුහුණුකර එවීමට සූදානම් බවට ඊයේ (16) දිනයේ පැතිර ගිය පුවත සම්බන්ධයෙන් සොයාබැලීමට ද ශ්‍රී ලංකා මානව හිමිකම් කොමිසන් සභාව පියවර ගෙන ඇති බව වාර්තා වනවා. ඒ අනුව කොමිසමේ නිලධාරීන් පිරිසක් ඊයේ ගනේමුල්ල හමුදා කඳවුරට ගොස් එහි එවැනි සූදානමක් පවතින්නේ ද යන්න පිළිබඳ සොයාබලා තිබෙනවා.
