ශ්‍රී ලංකා මහ බැංකුවේ අධිපති අජිත් නිවාඩ් කබ්රාල් සහ මුදල් අමාත්‍යාංශයේ ලේකම් එස්. ආර්. ආටිගල යන මහත්වරුන් ඇතුළු එම ආයතනවල උසස් නිලධාරීන්ට රජයේ මුදල් පිළිබඳ පිළිබඳ පාර්ලිමේන්තු කාරක සභාව හමුවේ ලබන 1 වැනිදා යලිත් පෙනී සිටින ලෙස දැනුම් දී තියෙනවා.
ශ්‍රී ලංකා මහ බැංකුවේ අධිපතිවරයා ඇතුළු පිරිසට මුදල් පිළිබඳ පාර්ලිමේන්තු කාරක සභාව හමුවේ පසුගිය 24 වෙනිදා පෙනී සිටින ලෙස මීට පෙර දැනුම් දී තිබුණා.එහෙත් ඔවුන් ඊට සහභාගිවී තිබුණේ නැහැ.
මුදල් කමිටු රැස්වීමට සහභාගී නොවීම සම්බන්ධයෙන් එම කමිටුවේ සභාපති, පොහොට්ටුවේ මන්ත්‍රී නීතිඥ අනුර ප්‍රියදර්ශන යාපා මහ බැංකු නිලධාරීන්ට සිය අප්‍රසාදය පළ කර තිබෙනවා.
මන්ත්‍රීවරයා පවසා ඇත්තේ පාර්ලිමේන්තු කැඳවීමට සහභාගී නොවී එලෙස කටයුතු කිරීම පාර්ලිමේන්තුවට කළ අගෞරවයක් බවයි.
රටේ පවතින ආර්ථික තත්වයට අදාළව කරුණු විමසීම සඳහා රජයේ මුදල් පිළිබඳ කාරක සභාවට කැඳවනු ලැබ සිටියේ ශ්‍රී ලංකා මහ බැංකුවේ අධිපති අජිත් නිවාඩ් කබ්රාල් සමඟ එහි උසස් නිලධාරීන්, මුදල් අමාත්‍යංශ ලේකම් එස්. ආර්. ආටිගල, ජනාධිපති නීතීඥ සංජීව ජයවර්ධන, ආචාර්ය රාණි ජයමහ සහ සමන්ත කුමාරසිංහ යන අයයි.
රටේ ආර්ථිකය ස්ථාවර තත්වයට ගැනීම සඳහා තමා ඇතුළු නිලධාරීන් පැය 24 පුරා ලොකු සංග්‍රාමයක යෙදී සිටින අවස්ථාවක පාර්ලිමේන්තුව ඒ ගැනද මධ්‍යස්ථව සලකා බැලිය යුතු බව තමාගේ අදහස යැයි ශ්‍රී ලංකා මහ බැංකු අධිපතිවරයා පවසා තිබෙනවා.
