රාජ්‍ය බැංකුවක් විසින් ලංකා විදුලිබල මණ්ඩලයේ සියලුම චෙක්පත් ආපසු හරවා යැවිමට කටයුතු යොදා තිබෙන බව වාර්තා වෙනවා.
ලංකා විදුලිබල මණ්ඩලයේ ඒකාබද්ධ වෘත්තීය සමිති සන්ධානයේ කැඳවුම්කරු රන්ජන් ජයලාල් සඳහන් කරන්නේ විදුලිබල මණ්ඩලයේ ගිණුම් වල ප්‍රමාණවත් මුදල් නැති වීම ඊට හේතුව බවයි.
අදාළ රාජ්‍ය බැංකුව විසින් තවදුරටත් ලංකා විදුලිබල මණ්ඩලය වෙත බැංකු අයිරා නිකුත් කිරීම නවතා දමා ඇතැයි ඔහු සඳහන් කර තිබෙනවා. මේ වන විටත් විදුලිබල මණ්ඩලයේ මුදල් කළමනාකරු විසින් තවදුරටත් එම බැංකුවට චෙක්පත් යැවීම සිදු නොකරන ලෙස විදුලි බල මණ්ඩලයට දන්වා ඇතැයි රන්ජන් ජයලාල් මහතා කියා තිබෙනවා. මෙලෙස චෙක්පත් ආපසු හරවා එවීමෙන් ලංකා විදුලි බල මණ්ඩලය හෑල්ලුවට පත් වන බවයි ඔහු කියන්නේ.
දැනටමත් එම රාජ්‍ය බැංකුව විසින් ලබාදිය හැකි උපරිම ණය මුදල් ප්‍රමාණය වන රුපියල් බිලියන 12 ඉක්මවා රුපියල් බිලියන 28 ක ණය මුදලක් ලංවිමට ලබාදී ඇති බවයි වාර්තා වන්නේ.
පවතින දැවැන්ත අර්බුදය හමුවේ මණ්ඩලයේ සේවක වැටුප් ගෙවීම ඉතාම අසීරු තත්ත්වයකට පත්ව ඇති බව පවසන ඒකාබද්ධ වෘත්තීය සමිති සන්ධානයේ කැඳවුම්කරු රන්ජන් ජයලාල් උත්සව මාසය වන විට වැටුප් ගෙවා ගත නොහැකි තත්වයකට ලංවිම මූල්‍ය අර්බුදය උග‍්‍ර වන බවත් සඳහන් කරනවා.
