පවතින අර්බුදයට විසඳුම් ලෙස රජය ගතයුතුව තිබූ ඇතැම් තීරණ පමාවූ බවට නැගෙන චෝදනාවන්ට එකඟ විය හැකි අවස්ථා ඇති බව සම කැබිනට් ප්‍රකාශක වැවිලි අමාත්‍ය, වෛද්‍ය රමේෂ් පතිරණ පවසනවා. එහෙත්, පවතින අර්බුදකාරී තත්වය කළමනාකරණය කිරීමට රජය උපරිම කැපවීමෙන් කටයුතු කරන බවයි ඔහු කියන්නේ.
රජයේ හවුල්කාර පක්‍ෂ 11 මගින් ඉදිරිපත් කළ යෝජනාවලියේ ඇති ජාතික නිෂ්පාදන ආර්ථිකයක් ඇතිකිරීම, අපනයන වැඩි කිරීම හා ආනයන සීමා කිරීම ආදී කරුණු ක්‍රියාත්මක කිරීම ද රජය මේ වන විට ආරම්භ කර ඇති අතර, මේ අවස්ථාවේදී සර්ව පාක්‍ෂික සමුළුවට සහභාගී වී තම සාධනීය යෝජනා ඉදිරිපත් කරන ලෙස විපක්‍ෂයේ සියලු පක්‍ෂවලට ආරාධනා කරන බව අමාත්‍ය රමේෂ් පතිරණ සඳහන් කළා.
කාට කාටත් දේශපාලනය කරන්නට නම් රට ආරක්‍ෂා කරගත යුතු බව කී ඇමතිවරයා එනිසා මේ අවස්ථාවේ තම සාධනීය යෝජනා ඉදිරිපත් කිරීම වැදගත් බවයි පවසන්නේ.
ඇතැමුන් විසින් කියන ආකාරයට මෙම සමුළුව පමාවූවාද යන්න ගැන කතාබහක් ඇති නමුත් මෙය කවදා හෝ පැවැත්වීම ලොකු දෙයක් බව ඇමතිවරයා සඳහන් කරනවා.
