ආහාර සහ ඉන්ධන උග්‍ර හිඟයකට මුහුණ දී සිටින ශ්‍රී ලාංකිකයන් කිහිප දෙනකු ඉන්දියාවේ තමිල්නාඩුවට ඔබ්බෙන් පිහිටි දූපතක අතරමංව සිටියදී ඉන්දීය වෙරළාරක්ෂක බලකාය විසින් බේරා ගෙන ඇතැයි ඉන්දීය මාධ්‍ය වාර්තා කරනවා.
එකම පවුලේ සැමියා සහ බිරිඳ ඔහුගේ මාස හතරක් වූ සිඟිති පුතු සහ තවත් කාන්තාවක් ඇගේ වයස අවුරුදු හයක මෙන්ම දොළහක දරුවන් දෙදෙනෙකුද ඒ අතර වූ බවයි ඉන්දීය මාධ්‍ය කියන්නේ.
ශ්‍රී ලංකාවේ දී ආහාර ලබා ගැනීම තමනට අපහසු වී ඇති බව ඔවුන් ඉන්දියා බලධාරීන්ට දන්වා තිබෙනවා.
බෝට්ටුකරුවකු විසින් රුපියල් 50,000ක මුදලක් ලබාගෙන ඔවුන් මෙම දූපතට ගෙනවිත් දමා ඇති බව ඔවුන් සඳහන් කර තිබුණා. තමන් මෙන්ම බෝට්ටුවලින් ඉන්දියාවට පලා යාමේ බලාපොරොත්තුවෙන් තවත් බොහෝ පිරිසක් බලා සිටින බව ඔවුන් ඉන්දීය වෙරලාරක්ෂක බලකායට පවසනවා.
මේ වන විට ඔවුන් සරණාගත කඳවුරැ වෙත ගෙන ගොස් ආහාර ලබා දී ඇති බවත් ඉදිරි කටයුතු සඳහා පොලිසියට භාරදී ඇති බවත් වාර්තාව සඳහන් කරනවා.
“ආර්ථික අර්බුදයකට මුහුණ දී සිටින දිවයිනෙන් පලා යාමෙන් පසු තමිල්නාඩුවේ රාමේෂ්වරම් වෙරළට ඔබ්බෙන් වූ සිව්වන දූපතේ අතරමංව සිටි ළමුන් තිදෙනෙකු ඇතුළු ශ්‍රී ලාංකිකයින් හය දෙනෙකු ඉන්දීය වෙරළාරක්ෂක බලකාය විසින් බේරාගෙන තිබේ. සරණාගතයින් අතර පිරිමියෙකු, ඔහුගේ බිරිඳ සහ ඔහුගේ මාස හතරක් වයසැති පුත්‍රයා සහ තවත් කාන්තාවක් සහ ඇගේ වයස අවුරුදු හය සහ දොළහක දරුවන් දෙදෙනෙකු ද වේ. සරණාගතයින් කියා සිටියේ තමන්ට ශ්‍රී ලංකාවේ දී ආහාර ලබා ගැනීමට අපහසු වී ඇති බවයි. ඉන්දීය වෙරළාරක්ෂක බළකායේ පාලනය යටතේ පවතින අරිචල්මුන්නයි ඔබ්බෙන් වූ සිව්වැනි දූපතට බෝට්ටු කරුවෙකු විසින් ඔවුන්ව ගෙනවිත් දමා ඇත. ඔවුන් පැවසුවේ බෝට්ටුකරුට ගමන සඳහා රුපියල් 50,000ක් පමණ ගෙවා ඇති බවයි. බෝට්ටුවලින් ඉන්දියාවට යාත්‍රා කිරීමට බොහෝ පිරිසක් බලා සිටින බව ඔවුහු පැවසූහ. වෙරළාරක්ෂක බලකාය ඔවුන් බේරා ගත්තේ hovercraft යොදාගෙනය. ඔවුන් වෙරළාරක්ෂක කඳවුරට ගෙන ගොස් ආහාර ලබා දී පොලිසියට භාර දුන් පසු මෙම පිරිස මණ්ඩපම් කඳවුරට රැගෙන ගියා” ඉන්දීය මාධ්‍ය සඳහන් කර තිබුණා.
